Nawenscia Sheryka Bazile, se tout non Miss Anacaona 2020 an ki gen pou non sèn li Kouka. Nawenscia fèt Kafou nan dat 14 Jen 2001 nan yon fanmi twa (3) timoun kote l se premye a. Li fè tout etid klasik li Académie de l'Enfant ak Collège Marie Régine (CMR), Salésiennes nan Kafou. Pou kounya, Miss Anacaona a ap etidye Relasyon Piblik ak Maketin nan ‘’Centre d´Étude Diplomatique Internationale’’ (CEDI). Men, li vle etidye Kominikasyon Sosyal tou.

Avan Miss Anacaona, Kouka te patisipe nan Miss Marie Régine nan lane 2018. Pou Kouka, Miss CMR se pi bèl eksperyans li nan zafè mis; li te bay konkou sa tan ak enèji. Menm si l te jwenn anpil difikilte men sa pa t anpeche l vanse jiskaske li te rive briye ak kouwòn nan sou tèt li. Toutfwa, Kouka di nou Miss Anacaona fòje karaktè l e montre l tout bon vre sa li gen nan djakout li kòm jèn fanm ki bèl e ki boure ak talan. Epi tou, pi gwo leson konkou sa te ba li se ‘’Moun ou nan konpetisyon ak li a ou pa fòseman ènmi l jan anpil moun konn abitye kwè l; li ka yon alye epi menm yon zanmi pi devan.

Lire aussi: Découvrons ensemble Naïka Lucien

De konkou mis li patisipe yo pa sèlman aktivite sa yo Kouka antreprann. Li kreye ak Melissa Fatal yon ajans ki rele KFS (Kouka Fashion Show) ki la pou bay jèn yo opòtinite pou mete sa yo gen nan djakout yo deyò san yo p ap kite okenn konplèks sosyete gen enpak sou yo. Se vre Kouka pa t ale reprezante fòmèlman kafou men li te sèl grenn moun ki te sòti kafou. Pou kounya Kouka vle vanse ak etid li , kontinye ede jèn yo , pouse KFS pi devan epi kreye pwòp mak pwodui kosmetik pa l.

Rodolson JEANTY
Jeantydolman87@gmail.com