Lè n kare kò n epi n f on koutje sou zafè kidnapin, lavi chè ak lòt kalamite k ap brase bil popilasyon an, yon ti moman lajwa ak lakontman se sa moun k ap viv nan komin Kafou  te bezwen.  Se pou sa a responsab ki nan Sant Kiltirèl Emanyèl Chalmay ki chita kò l nan  Tò 10 la  te   deside   pote pou nou   « à ciel ouvert »  nan jou ki te dimanch  12 Desanm 2021 an sòti 5 è pou rive 7  è nan aswè,  tout moun te la pou yon  randevou dominikal san parèy.

Aktivite a te kòmanse ak  yon mòso enstrimantal yon jèn atis, malgre timidite sa pa t anpeche l  chame piblik ak yon chante  Mika Ben ki rele  Ayiti se. Apre sa a gen yon gwoup ki pote non  EIVC (Ensemble des Instruments à Vent de Carrefour) Ki  te pran entèprete mizik Ti zwazo pandan  animatè  sware a, Gabyhno,   t ap li yon tèks ki pa t manke mete dlo nan bouch piblik la.  N ap raple nou tou   Gabyhno se  animatè an chèf sant kiltirèl la . Li te tou pwofite Prezante Pierre  Manigat Junior ki se aktyèl anbasadè kiltirèl komin nan.  Jounalis eksperimante a te  pwofite okazyon sa pou montre enpòtans Manno Chalmay  te genyen nan  mizik  ayisyen an. Epi l te pwofite  montre  kòman defen chantè mizik angaje a te yon vanyan gason, yon nèg  kote aksyon l ak pozisyon l ta dwe rete yon patrimàn pou sila k ap vini  yo.

Lire aussi: À ciel ouvert, pour des mots et de la musique à découvert 

Pou plis anbyans, gen yon dyo k te entèprete yon chante Manno Chalmay  aprè sa a se  Lionel Benjamin yo te met lonè se pou sa a yo te chante : Ou kite m w ale  ak Se mwen abdenwèl.  Etienne Nelsonne ki gen pou non atis li Eti- N, pa bò kote pa l, ta pral chame piblik ak yon bèl tèks li fè ak non ansyen prezidan peyi a. Jèn eslamè sa a te tou pwofite okazyon an pou l envite piblik la nan vant siyati premye albòm li k ap fèt 19 Desanm ane sa.  Nan menm  rejis tèks la Steev Lau te deklame yon  tèks sou lanmou ki te rive ak fòs sou piblik la. Òkès  ki te ban n  tout mizisyen sa yo  te fini sware a ak twa (3) entèpretasyon san n pa bliye   kokennchenn akonpayman  mayestwo Claudy a ki te pote yon diplis sou kibòd la : An sèl pitit yon mizik Raoul Guillaume, kafe griye ak  Ti tèt la yon klasik koupe klouwe . Moun yo pa t kite okazyon an pase san yo pa t make de twa pa epi ploge sou rit mizik yo.

 ‘’A ciel ouvert’’ ta vle vin tounen yon randevou kiltirèl k ap reyini tout moun se pou sa a moun k ap viv nan zòn ki toupre Kafou yo pa ta dwe rate l sitou moun k ap viv nan komin nan. Yon moun ki pa ko patisipe nan aktivite sila a ta dwe chèche konnen dat l ap fèt pou yo pa rate evenman san fòs kote sa a.

Rodolson JEANTY Jeantydolman87@gmail.com