Pou jou ki te 7 desanm 2018 lan, klèb cool corner (4 riyèl rivyè boudon) te akeyi Dekò, yon espektak Vanessa JEUDI avèk patisipasyon Gäelle BIEN-AIMÉ pou mizansèn lan.

Responsab yo pa t pran tan, se te blòk 6 zè edmi yo te tanmen ak yon pawòl ki ap rakonte mizè fanm ap pase nan tout kouch nan sosyete a . Bèl vwa Vanessa Jeudi pa t manke fè sans ak mim lòt aktris yo. Mizisyen yo te prèske transande piblik la tèlman yo te pwòch pèfeksyon ak kout tanbou papa danbala ki t ap klewonnen. Aprè vwa Dana PIERRE-SAINT, Tafa mi-soleil ak Tasha SAINT-FORT te tounen yon wanganègès tèlman li te chame nou nan fason li t ap kriye mizè fanm yo.

Yo rele spektak la Dekò pou de (2) rezon pou: 1) Dekò nan sans dekoraksyon ki pou fè bèbèl 2) Epi pou kò fanm yo ki ap chanje dezantan. Nan ka sa, se yon sityasyon ki vin kreye yon otomatis machinal lakay yo tou-otan yo ap rantre pi fon nan lojik sistèm kapitalis lan . Lè sa a, kò inosan yo te genyen avan an ap chanje ti kras pa ti kras, swa nan fè travay fòse oubyen nan lòt egzijans sosyete a fè yo nan fason w dwe chita, mache, penyen…

Pou Tasha SAINT-FORT youn nan komedyen yo ‘’ Li angaje l akòz gen moun nan antouraj li ki sibi vyolans. Epi, emosyon moun yo rive sou li, se pou sa , li deside sèvi ak kò l ki pou li menm se yon bon zam pou goumen kont vyolans sa yo’’. N ap raple, Bosal mizik gwoup ki te ede aktivite sila ateri se yon labèl ki ap pwodui yon bann atis ak gwoup ki angaje yo pou denonse sa ki p ap mache nan peyi a. Pou Francois Sebastien Daniel, li menm youn nan espektatè yo atant li te konble akòz mesaj ki tap sikile nan espektak la epi travay senik la te rive sou li.

Se yon espektak ki marye vwa, kò, chan ak dans. Kidonk, se yon kreyasyon ki konsidere espas senik la (dekoraksyon ) ak doub mouvman sistèm kapitalis la ki reklame kò fanm yo. Sosyalite sistèm kapitalis la rekipere kò travayèz yo epi refabrike yo jouk kò yo pran fòm travay y ap fè a (pataswèl mouche, kout bòt ajan lameri, aksidan travay nan faktori elt). Dekò se yon tantativ pou medam yo vin mèt kò yo. Augusto Boal, yon dramatij brezilyen, nan reflechi sou popilè kreye konsèp ‘’alienation musculaire’’ pou teyorize sou sityasyon sila.

Pou n fini, Stephanie Enauld te ba n yon bèl koyegrafi kote n te santi tout bon vre chak santiman l nan aksyon l t ap poze yo. Se te yon bèl espektak ki penn mouvman feminis lan yon lòt jan an Ayiti. Sepandan, nou espere aktivite sa p ap rete sèlman nan estad pawòl epi yo va fè yon enpak sou reyalite a jan responsab yo espere sa.